Plútó
Reikistjarnan Plútó var fyrst uppgötvuð árið 1930, þegar hún var viðurkennd sem níunda reikistjarna sólkerfisins. Hún er þó frábrugðin hinum reikistjörnunum á marga vegu. Hún hefur braut sem er á öðru plani og sporbrautin er óregluleg, að hluta til innan sporbrautar Neptúnusar. Hún er aðeins örlítið stærri en Tunglið og massi hennar er um það bil 0,2% af massa jarðar. Þessar staðreyndir, ásamt uppgötvun annarra svipaðra fyrirbæra utan sporbrautar Neptúnusar, leiddi til þess að Alþjóðasamband stjörnufræðinga breytti skilgreiningu á reikistjörnu árið 2006 til að útiloka Plútó.
Margir stjörnufræðingar halda þó áfram að líta á Plútó og aðrar dvergreikistjörnur sem reikistjörnur. Stjörnuspekingar telja Plútó einnig vera eina af reikistjörnunum.
Plútó er útvörður Svörtu meginsólarinnar í sólkerfinu okkar.
Grísk goðfræði
Í grískri goðafræði var Plútó guð undirheimanna. Hann var sonur Krónusar, títans sem Rómverjar kölluðu Satúrnus, og Reu, annars títans. Títanar eru mjög öflugar fallnar verur sem misnota vald sitt.
Elsta nafn Plútós er Hades, sem þýðir „hið ósýnilega“, undirheimar eða yfirráðasvæði djöfulsins. Þetta eru heimynni hinna látnu undir jörðinni. Kerberús gætti hliða undirheimanna, þríhöfða hundur sem kom í veg fyrir að sálir kæmust nokkurn tímann út. Hetjur og dyggðugir menn fóru annað hvort til Elysíusvallanna eða til eilífs lífs á eyjum hinna blessuðu þar sem gullöldin var endursköpuð.
Plútó, sem réði undirheimunum ásamt konu sinni, Persefónu, var óbilgjarn guð sem guðir og menn hötuðu og óttuðust. Samkvæmt goðsögninni smalaði hann ófúsum sálum inn í ríki sitt með heygaffli.
Síðar tóku almennar hugmyndir um persónuleika hans stórkostlegum breytingum. Í stað þess að vera guð dauðans sem hataðist við lífið, varð hann allsnægtarguð. Plútó þýðir í raun „auðgjafi“. Tengsl Plútós við auð liggur að baki orðsins „auðvaldsmaður“ — sá sem fer með mikið vald og misnotar það vald til að öðlast auð og öfugt sá sem öðlast vald í gegnum auð. Það er sem sagt auðvaldsmaður sem misnotar vald sitt, og við höfum marga slíka í samfélagi okkar í samtímanum.
Í stjörnuspeki
Þó að margir stjörnuspekingar telji að orkutíðni Plútós hafi uppbyggilega, endurlífgandi hlið, þá er hann óneitanlega tengdur dauðanum og áhrif hans eru oft mjög skaðleg.
Í öllum greinum stjörnuspekinnar er Plútó tengdur við hörmulega atburði, svo sem upphaf styrjalda og fall og/eða dauða valdhafa. Hann ríkir yfir öllu leyndardómsfullu og sjálfseyðingarhvötinni. Í hversdagslegri stjörnuspeki — stjörnuspeki þjóða og heimsatburða — ríkir Plútó yfir kjarnorku, eldsvoðum, förgun úrgangs og öllu sem felur í sér útbreidd mannslát og eyðileggingu. Hann ræður einnig yfir geislavirka frumefninu plútóníum.
Plútó hefur tilhneigingu til að afneita eða eyðileggja hæstu birtingarmynd einstaklingsins í því stjörnumerki, plánetu og húsi þar sem hann birtist við fæðingu, framvindu eða þverganga.
Þvergöngur Plútós
Í hefðbundinni stjörnuspeki eru þvergöngur Plútós í harðri afstöðu gagnvart stöðu sólar við fæðingu eða við aðrar mikilvægar reikistjörnur sen er oft tengt upphafi styrjalda. Ef þjóðir sleppa við stríð standa þær frammi fyrir ógnunum sem eru jafn alvarlegar eða nærri eins alvarlegar og stríð. Þetta gæti falið í sér fjárhagsvandamál, kjarnorkuslys, valdabaráttu, borgaraleg uppþot, hryðjuverk og stjórnvöldum er boðið byrginn.
Til dæmis þveraði Plútó bandarísku fæðingarsólina á 10° í nautinu í amerísku borgarastyrjöldinni (1861–65). Þegar stríðið hófst 12. apríl 1861 var Plútó á 8° í nautinu. Í lok stríðsins 9. apríl 1865 hafði hann þverað 12° í nautinu. Það er erfitt að ímynda sér að alvarlegri þjóðarátök en borgarastyrjöldina; hún hefði auðveldlega getað leitt til endaloka Bandaríkjanna ef ekki hefði verið fyrir upplýsta forystu.
Plútó samtengdist fæðingarsól Sovétríkjanna frá janúar 1988 til októbers 1991, tímabil sem féll saman við upplausn Sovétríkjanna.
Þar sem Plútó er hægfara reikistjarna sem tekur 248 ár að ferðast í kringum sólina, geta áhrif samtengingar Plútós tekið allt frá nokkrum mánuðum upp í nokkur ár að koma fram.
Yfirráð
Í fæðingarstjörnuspeki ræður Plútó yfir:
- endurlífgun
- umbreytingu
- endurnýjun
- eyðileggingu
- sviksamlegri meðhöndlun, afneitun, nauðung,
tortímingu.
Í veraldlegri stjörnuspeki ræður Plútó yfir
- misnotkun valds í öllum myndum
- öllu sem er falið og leyndardómsfullt
- útbreiddum dauða og eyðileggingu, sérstaklega af völdum stríðs, kjarnorku og eiturefna
- valdabaráttu
- hryðjuverkum
- alræðisríkjum
- njósnasamtökum
- harðstjórum
- leynilögreglu
- skipulögðum afbrotum
- sjálfseyðandi starfsemi
- eyðileggjandi öflum sem eru utan sjálfsstjórnar, svo sem stríði, náttúruhamförum, kreppum og kjarnorkuslysum
Plútó í stjörnumerkjunum
Vegna sporöskjulaga brautar sinnar er tíminn sem Plútó er í hverju stjörnumerki breytilegur, frá 12 árum í sporðdrekanum til 30 ára í nautinu. Þegar Plútó þverar stjörnumerkin markar það miklar breytingar á orku plánetunnar. Plútó gekk í vatnsberann 23. mars 2023, 248 árum eftir að hann gekk síðast í þetta stjörnumerki. Við getum fengið einhvern skilning á því hvað þetta gæti boðað með því að skoða hvernig Plútó virkjaði orku fyrri stjörnumerkja þegar hann fór í gegnum þau.
Plútó í Bogmanninum: 1996 til 2008
Árið 1996 talaði Elizabeth Clare Prophet um hugsanlegar birtingarmyndir þvergöngu Plútós gegnum bogmanninn:
Plútó er reikistjarna umbreytinga, eyðileggingar og tortímingar. Bogmaðurinn stjórnar heimspeki, trúarbrögðum, menningu, langferðalögum og atburðum sem gerast í framandi löndum eða fjarlægum stöðum. Undir áhrifum bogmannsins geta menn hagað sér á réttlátan, bjartsýnan og göfugan hátt. En í neikvæðum ham eru þeir sem eru undir áhrifum bogmannsins líklegir til að láta í ljós gremju eða hefnigirni — oft af pólitískum eða heimspekilegum ástæðum.
Á þessum tímamótum má búast við miklum breytingum á trúarbrögðum og stjórnarfari, gildum okkar og trú, menntun okkar og menningu. Við munum sjá dramatískar breytingar á þeirri sýn sem við höfum á okkur sjálfum, heiminum, stöðu okkar í alheiminum og sambandinu við Guð.
Áður fyrr féll þverganga Plútós í bogmanninum saman við gullöld Períklesar í Grikklandi, trúboð Jesú Krists, ítölsku endurreisnina og upplýsinguna í Evrópu. Þá var búddhadómur innleiddur í Mið-Kína og kristni í Saxlandi. Þetta féll saman við fyrstu sameiningu Kína og löggjöf í Rómaveldi á sjöttu öld og í Rússlandi á elleftu öld.
Landkannanir, uppgötvanir og framtíðarsýnir voru á kreiki. Portúgalar komust til Kína með því að sigla umhverfis Góðrarvonarhöfða. Roger Bacon spáði fyrir um uppfinningu gufuskipsins, flugvélarinnar og sjónvarpsins. Sorbonne-háskólinn var stofnaður í París og margar dómkirkjur og musteri voru byggð í Evrópu og Asíu.
Þessi hringrás féll einnig saman við mikil trúarleg átök. Jesús var krossfestur og Jóhannes skírari var hálshöggvinn. Rómarkeisarinn Díókletíanus hóf alræmdar ofsóknir sínar gegn kristnum mönnum. Í Aþenu var heimspekiskóli Platons lagður niður vegna svokallaðra heiðinna hugmynda sinna. Í Persíu var Mani tekinn af lífi fyrir að halda því fram að hann væri spámaður sem hefði fengið guðlegar opinberanir. Í Evrópu ofsóttu Þjóðverjar „villutrúarmenn“ og Marteinn Lúther leiddi mótmælendasiðbótina.
Hringrás Plútós í bogmanninum féll einnig saman við stríð — stríð um stjórn véfréttarinnar í Delfí, seinna Pelópsskagastríðið, seinna púnverska stríðið og sjö ára stríðið.
Núverandi þverganga Plútós í bogmanninum, líkt og fyrri yfirferð, getur haft bæði jákvæða og neikvæða þætti. Frá [því þetta var skrifað] og til ársins 2008 getum við innleitt öld uppljómunar og ný heimstrúarbrögð. Við verðum þó að búast við andstöðu við þessum framförum — kúgun trúarbragða og nýrra hugmynda og jafnvel búast við hugsanlegu upphafi trúarstyrjalda.
Þessi tólf ára hringrás gæti verið tími bjartsýni og útrásar. Við gætum orðið vitni að viðurkenningu fyrir erlendum menningum og framförum í menntun. Upplýsingar og menning munu færast yfir landamæri sem aldrei fyrr. Við gætum orðið ríkari af reynslunni, en við gætum líka séð menningarheima í átökum — átökum af þeirri gerð sem hafa átt sér stað í Bosníu, Rúanda og Mið-Austurlöndum. Við gætum líka séð fólki neitað um menntun eða hún notuð til innrætingar og eftirlits.
Samuel Huntington, prófessor í stjórnmálafræði við Harvard, heldur því fram að í náinni framtíð muni verða miklir menningarárekstrar. Vesturlönd munu standa frammi fyrir Asíu í efnahagsmálum og Íslam í trúmálum.[1] Með Plútó í bogmanninum er hugsanleg aukning á átökum milli ólíkra þjóðernis-, trúar- og kynþáttahópa. Ofsóknir eftir stéttar- eða þjóðernislínum gætu valdið fjöldaflutningum með ófyrirsjáanlegum afleiðingum. Spurningin um innflytjendur verður umrædd í mörgum þjóðum. Sumar munu taka við flóttamönnum, aðrar ekki.
Hringrás Plútós í bogmanninum mun leggja grunninn að umbreytingu stjórnarfars og jafnvel eðlis sjálfs stjórnarfarsins. Heimsveldi og þjóðahópar eru líklegir til að eflast og, þegar þeir lenda í átökum hver við annan, verða þeir brytjaðir niður eða endurskipulagðir.
Þetta gæti orðið tími pólitískrar gerjunar eins og sú sem kom á undan bandarísku og frönsku byltingunum. Ný heimsskipan gæti tekið á sig mynd. Ný yfirvöld gætu komið fram. Og við verðum loksins neydd til að leysa þá ráðgátu sem ríkti mestan hluta tuttugustu aldarinnar: Getur hálfur heimurinn verið ánauðugur og hinn helmingurinn frjáls?
Stjörnuspekilegar vísbendingar segja okkur að stjórnmálakerfi frelsis eða harðstjórnar og ringulreiðar muni byrja að myndast. Sú stjórnmálamenning sem þróast á þessum tíma mun byrja að kristallast í ríkjandi stjórnarfar sem verður komið á fót á meðan Plútó gengur í steingeit, sextán ára tímabilinu sem nær frá 2008 til 2024.[2]
Plútó í steingeit: 2008 til 2024
Plútó færist inn í steingeit árið 2008 og dvelur þar til ársins 2024. Á þessum tíma gæti orðið mikil endurskipulagning og umbreyting á öllum gerðum samfélagslegrar skipulagningar, þar á meðal þjóðum og þjóðahópum, eins og Sameinuðu þjóðunum.
Stofnanir reknar í hagnaðarskyni og sjálfseignarstofnanir, fyrirtæki, kirkjur og aðrar trúar- og annars konar heimsýnar stofnanir munu þegar hafa gengið í gegnum dramatískar umbreytingar undir stjórn Plútós í bogmanninum og Úranusar og Neptúnusar í vatnsberanum. Nú, með áhrifum Plútós í steingeit, munu þau endurskipuleggjast. Þetta mun næstum örugglega ná til samfélaga og jafnvel fjölskyldna.
Á þessu tímabili mun endurdreifing valds eiga sér stað og nýjar leiðir verða til að nýta vald innan allra samfélagslegra stofnana. Þetta mun leiða til mikillar valdabaráttu. Eftirstandandi öfl sem halda fast í völd gamla skipulagsins munu lenda í átökum við þau sem reyna að þróa hina nýju skipan.
Steingeitinn ríkir yfir hinu gamla en er líka brúin að framtíðinni. Þegar Plútó gengur í steingeitina verðum við þegar komin vel inn í nýja upplýsinga-/viskuöld og skriðþungi breytinganna mun brjóta niður öll eftirstandandi afturhaldsöfl sem vilja draga fólk aftur til fortíðarinnar. En ef við erum ekki varkár gætum við séð tilkomu eins konar hátæknilegrar harðstjórnar. Plútó í steingeit gæti einnig fært þróun samfélagsgerða á mun hærra stig, allt eftir því hvort okkur tekst að taka upp æðri lifnaðarhætti.
Á stórum hluta þvergöngu Plútós um steingeit verður Neptúnus í fiskunum. Þar af leiðandi mun gamla skipanin sundrast hratt (Neptúnus í fiskunum) og önnur skipan mun kristallast hratt (Plútó í steingeit).
Spurningarnar sem þessi kynslóð stendur frammi fyrir verða: Munu þessi áhrif vinna saman eða munu þau vinna gegn hvor annarri? Verða til tveir aðskildir heimar — samúðarfullur heimur Neptúnusar og ógnarstjórnarheimur Plútós? Eða mun Plútó í steingeit skapa þjóðfélagsgerð sem, eins og falleg platínu-umgjörð, sem umvefur nýjan, skínandi demant Neptúnusar í fiskunum? Það kemur í ljós.
Þótt fyrstu áratugir nýrrar aldar færi með sér vaxtarmegn stórkostlegra vitundarbreytinga sem er bæði efnileg og framsæknin, gætum við samt þurft að sigla ólgusjó til að komast á leiðarenda.[3]
Plútó í vatnsberanum: 2023 til 2043
Vatnsberinn er tengdur frelsi, byltingu (til góðs eða ills) og tæknilegri og félagslegri nýsköpun. Hann ræður yfir framförum og framtíð. Þótt vatnsberinn ríkji yfir hópum og hópstarfsemi, þá gefur hann einnig hvata til einstaklingshyggju. Þeir sem fæðast undir vatnsberamerkinu eru oft mjög frumlegir í nálgun sinni á málefnum. Vatnsberinn ræður yfir miðlun hugmynda og upplýsinga. Í öfugsnúinni mynd getur vatnsberinn rúmað harðstjórn eða stjórnleysi frekar en frelsi.[4]
Við gætum vel séð uppbyggilega og niðurrífandi þætti vatnsberans koma fram í þessari umferð, eins og við sáum síðast þegar Plútó var í vatnsberanum, frá 1778 til 1798. Þetta tímabil fól í sér bandaríska sjálfstæðisstríðið (1775 til 1783) og frönsku byltinguna (1789 til 1799), þar á meðal ógnarstjórnina (1793 til 1794). Þetta var tímabil grundvallarbreytinga á samfélagsgerðinni, þar sem gamalli skipan var kollvarpað og nýrri komið á fót. Við sáum meira frelsi (eins og var komið á í bandarísku byltingunni), en einnig uppgang harðstjórnar (eins og í ógnarstjórninni).
Heimildir
Stjörnufræðilegar upplýsingar og kaflinn „Plútó í stjörnumerkjunum“ eftir ritstjórana.
Annað efni er úr eftirfarandi heimildum:
Elizabeth Clare Prophet, 30.júlí 1989.
Elizabeth Clare Prophet, The Astrology of the Four Horsemen, Orðalisti yfir stjörnuspeki.
Elizabeth Clare Prophet, Saint Germain On Prophecy, 2. rit, 15. kafli.
- ↑ Sjá Samuel P. Huntington, The Clash of Civilizations and the Remaking of World Order; (Átök siðmenningar og endursköpun heimsskipanarinnar;) og pallborðsumræður, „Pluto in Sagittarius,“ The Mountain Astrologer, júlí 1995, bls. 13.
- ↑ Elizabeth Clare Prophet with Patricia R. Spadaro and Murray L. Steinman, Saint Germain’s Prophecy for the New Millennium, 1. kafli.
- ↑ Elizabeth Clare Prophet with Patricia R. Spadaro and Murray L. Steinman, Saint Germain’s Prophecy for the New Millennium, 5. kafli.
- ↑ Elizabeth Clare Prophet, 29. júní 1991.